Hvers vegna segi ég JÁ við SAMNINGAVIÐRÆÐUM um aðild að ESB?

Guðmundur G. Hauksson - sjá meira um mig

Ég hef alltaf verið mikill alþjóðasinni og á þar samleið með stórum hluta íbúa þeirra 27 evrópuríkja sem eru í ESB og þeim 3 ríkjum sem við erum með í EFTA og EES. Áhugavert að 74% þeirra sem búa í ESB löndum eru ánægð innan ESB. Þekki vel til á Spáni þar sem ég á þar eignir og bý þar hálft árið. Vegna ástandsins í heiminum er Noregur orðinn tvístígandi og ef þeir á einhverjum tímapunkti færu inn í ESB, þá værum við á Íslandi með okkar EES samning í uppnámi.

Ég er sammála mörgum NEI sinnum um að, ef við náum ekki fram varanlegum undanþágum í hugsanlegum samningi við ESB, þá ættum við alls ekki að fara þangað inn. Að hafna viðræðum um samning að ESB er samt að loka sig frá því að opna möguleika á að efla okkar stöðu í alþjóðlegu samstarfsumhverfi. Ég er aftur ósammála mörgum NEI sinnum um að okkar möguleiki á að semja um varanlegar undanþágur fyrir sjávarútveg og landbúnað sé enginn. Þetta vitum við ekki nema láta á samninga reyna.

Það eru flestir sammála um að EES samningurinn hefur verið íslendingum farsæll og í raun að hann hafi lagt grunn að þeim lífsgæðum sem við búum við í dag – sjá meira. Við höfum í gegnum tíðina fengið mikið í gegnum alþjóðlegt samstarf og má þar nefna Marshall hjálpina sem lagði grunninn að innviðum, EFTA sem opnaði fyrir fríverslun og EES sem samþætti íslenskt efnahagslíf fullkomlega við Evrópu.

Nú er kominn sambærileg staða og þegar við vorum í viðræðum um EES samninginn og þeir sem ætla að segja NEI við samningaviðræðum eru sömu aðilar og voru á móti NATO, EFTA og EES á sínum tíma. Sagana segir okkur að þeir hafi haft rangt fyrir sér á sínum tíma og í dag eru þessir aðilar að koma í veg fyrir að við fáum að skoða möguleika okkar í samningaviðræðum við ESB.

1. Umræðunni um sjávarútvegsmál tengt samningi við ESB hefur oft verið snúið á haus undanfarið. Ef við næðum fram varanlegum undanþágum fyrir okkar sjávarútveg mundi staða sjávarútvegsfyrirtækja á Íslandi batna. Hér er nokrar staðreyndir um stöðuna og staðreyndir um hverju aðild mundi breyta. Aðild að tollabandalagi ESB gæti skapað milljarða tekuauka fyrir Ísland.
   

2. Vextir munu lækka á Íslandi með inngöngu í ESB löngu áður en Evran verður tekinn upp. Ástæðan er sú að vextir ríkis endurspegla ekki bara verðbólgu, heldur einnig áhættuálag (risk premium). Helstu ástæðurnar fyrir því að ESB-aðild ein og sér myndi lækka vexti á íslensku krónunni má sjá hér.
   

3. Það er oft talað um að Ísland missi sitt fullveldi ef gengið yrði inn í ESB. Spurningin er hvort Þýskaland, Frakkland, Svíþjóð, Danmörk og hin 23 ríkin innan ESB séu ekki fullvalda ríki í alþjóðlegum skilningi? Þessi ríki eru að sjálfsögðu enn talin fullvalda ríki í alþjóðlegum skilningi, þó þau hafi framselt hluta af valdi sínu til ESB – sjá meira um þetta.
   

4. Sumir halda því fram að elli- eða örorkulífeyristekjur lækki við ingöngu í ESB. Þetta er alrangt og elli- og örorkulífeyrir frá TR og greiðslur úr íslenskum lífeyrissjóðum eru fyrst og fremst ákveðnar samkvæmt íslenskum lögum og reglum. ESB-aðild myndi ekki færa ESB vald til að ákveða upphæð íslenskra elli- eða örorkulífeyristekna – sjá nánar.

Ég ítreka enn og aftur að þetta eru samningaviðræður sem verið er að kjósa um 29. ágúst. Það er sama hversu oft NEI aðilar segja að þetta sé kosning um aðild, þetta er kosning um samningaviðræður. Kosning um aðild að ESB er eftir samningaviðræður, ef viðunnandi samningur fæst.